會考9A尖子從投行出走創Coding學校 春風化雨由5歲開始

兩年前，iM專訪曾被BBC評為位百大創業女性辛婥琳（Michelle），當時她放棄投資銀行的高薪厚職，改行學Coding，回港後更開辦專為小朋友而設的Coding學校First Code Academy。她創辦的Coding學校在香港有兩間分校，每周開設近80班興趣班，業務也擴展至新加坡和台灣。

今次再度專訪Michelle，發現她的Coding學校學生愈來愈細個，今年起更開始教5歲小朋友學寫程式。

好多人會覺得愈教愈細，小朋友點學呀？其實近年有好多因素都有影響，小朋友好細個已經有iPad或者Tablet，3年前無咁普及。

這間Coding學校在2013年成立，起初教授初中生為主，後來針對不同年齡層的小朋友，按其能力設計課堂內容，大致可為4種級別，為5至8歲小朋友而設的興趣班着重從實踐中學習（Hands-on Experience），透過不同的工具去協助小朋友思考手機和電腦背後的遊戲設計等，如電路積木LittleBits、發明工具箱Makey Makey等；9至11歲則學寫自己的程式和製作3D遊戲，編寫程式會較前者複雜；12歲開始會着重教授私隱、保安、社交議題；15歲以上更可以了解NGO背後需要和設計相關程式。

▲ 現時有不少工具輔助教學，讓小朋友學得更輕鬆，如上課時小朋友需要一人有一部電腦或Tablet。（相片來源：iMoney智富雜誌）

根據官網資訊，公司現時每周開近80班興趣班，課堂以英語教授為主，透過小班教學形式教授小朋友編寫程式。Coding學校創辦人Michelle指，小朋友愈早開始接觸電子產品，有助他們學寫程式，近年市場上也多了不少道具協助教學，

科技有新發展，多了適合5歲用的工具和機械人，令小朋友更易去接觸Coding。

香港家長望子成龍，求學心切，故Michelle不時會接到家長電話，詢問子女幾歲可以學寫程式，部分更希望自己3、4歲的小朋友盡快上堂，與時代接軌。

我們都明白家長想Plan得長遠啲，如果有好嘅嘢，希望小朋友快啲開始。我覺得5歲係一個適合的歲數，也有相關的物資和工具讓小朋友享受學習。

▲ 走進位於上環的Coding學校，裏面貼滿學生的照片，Michelle表示教小朋友最開心就是見到他們進步。（相片來源：iMoney智富雜誌）

學Coding非男生專利

訪問當日，記者發現課堂上有不少女生報讀，坊間大多認為Coding與數學頭腦有關，男生報讀會較為有利。然而，Coding是利用邏輯思維去解決問題，只要是對Coding有興趣、有辯才和邏輯思維佳，不論男女，同樣能夠駕馭Coding，正如Michelle一樣。她自小已對I.T有濃厚興趣，任職投資銀行時，因工作關係接觸到不少科技股票，

我覺得呢個行業好有趣，見到阿里巴巴、騰訊管理層時，佢地團隊雖然細，但創造出來的App可以影響到其他人生活，如淘寶、WeChat。

她離開金融行業後，曾創辦科技公司，並推出印花App，儲滿10杯可換1杯免費咖啡，減少攜帶過多印花卡。雖然第一次創業反應未如理想，但她沒有放棄投身I.T行業的念頭，

我發覺要係科技呢行發展，一定要識得Coding，如果我想喺科技界發展，但對Coding一無所知，就好似差一截。加上我一直熱衷於科技，想提升自己競爭力，所以去矽谷學寫程式。

學習Coding並非一件易事，雖然Michelle自小成績優異，會考考獲9A佳績，在芝加哥大學主修經濟，自言「好鍾意讀書」的她，學Coding同樣是一項新挑戰，

後來我睇咗10幾本書，對Coding都係一頭霧水，我覺得好唔忿氣，愈難愈要學到。

正因為這份執着，她在矽谷「Hackbright Academy」參加專為女性而設的Coding課程，由最頭學起，

當時我好好彩，搵到一個班淨係俾女仔學Coding，兩名創辦人仲要係第一屆舉辦女性Coding班。

完成課程後，她在當地的Startup「Bump」（檔案交換程式）及「Buffer」（社交媒體）做了兩年軟件工程師，回港後也在自己的母校聖保祿學校舉辦工作坊，教授初中女生編寫程式。

現時，Coding學校不乏女生報讀，年紀愈細，報讀的女生就愈多，

其實年紀愈細，男女比例就愈好，有部分年齡層更可以是1：1。

▲ 年紀愈細，課堂上的男女比例就愈好，部分更可達1：1。（相片來源：iMoney智富雜誌）

逢周三，學校更設有一班全女班的課堂，讓女生更安心自在編寫自己的程式，

我記得有個學生好熱衷女權，所以佢整咗個App教人唔好岐視女性。

學生透過製作小測試去講述心中所想，

測試係要你估一個人係男定女，佢鍾意粉紅車，又鍾意Taylor Swift，原來不一定是女生，最後該學生搵到一個名人符合以上條件，但他是男性。

Michelle認為小學生能夠將程式編寫融入生活當中，透過Coding去講述自己的理念，超越課堂所教授的內容。

▲ Michelle引入矽谷教Coding的課程，現時5歲的小朋友已可以開始學寫app。（相片來源：iMoney智富雜誌）

歷經創業失敗學會務實

在旁人眼裏看來，年輕貌美的Michelle可算是人生勝利組，在投資銀行任職過，前途一帆風順。即使轉行教程式編寫，同樣成功，獲福布斯評為30名30歲以下的成功女企業家，絕對是「巾幗不讓鬚眉」。然而，對於經歷過創業失敗的Michelle而言，卻曾想過不再創業。

其實兩次創業的心態好唔同，第一次係大浪漫主義，覺得創業好似好型，又可以寫自己係創業家。當第二次開始搞Coding學校有好多顧慮，又用咗自己的積蓄。我曾經同自己講，我呢一生人唔要再創業，所以今次創業諗咗好多嘢，到底呢條呢個Path係咪啱自己，我做緊嘅野係咪有人想要。

今次創辦Coding學校，她實際和謹慎得多，視乎市場需要去推出新班，如推出全女班課堂試水溫，當有家長詢問加班詳情時，才會再加班。她認為創業前，應先問自己想學到和得到甚麼，不要只想着創業家光環，

其實，星期日無人開門，我都係自己返來開，所以創業家背後，有好多嘢都唔係好風光。

辛婥琳 Michelle Profile

• First Code Academy創辦人
• 會考曾考獲9A成績，後赴美國芝加哥升學，主修經濟
• 獲BBC選為百大女性，去年也獲福布斯選為亞太區30歲以下30強之一
• 曾在投資銀行高盛任股票分析師
• 在矽谷學Coding，完成課程後在當地做軟件工程師，回港後開設Coding學校

▲ First Code Academy創辦人辛婥琳（相片來源：iMoney智富雜誌）

【其他熱話】K3中文配字功課 大學生：我都唔識

【其他熱話】小三中文工作紙看圖估成語 你識幾多題？

【其他熱話】患罕見遺傳病立志成大體老師：盼跟我一樣的人不再受苦

（節錄）

全文刊於《iMoney智富雜誌》第491期（收費閲讀）

iMoney智富雜誌facebook

標題經TOPick修改，原題為「Coding學校女校長 春風化雨由5歲開始」。